الرئيس المؤمن حيكفر الشعب …

يا اخ يا رئيس يا مؤمن.. لو حتخرج تصلي كده يبقى صلي في بيتكوا وثوابك حيبقى اكبر ان شاء الله وفي رقبتي انا شخصيا.. يوم القيامة حاقول انا اللي شورت عليه الشورة دي.. فليسعك بيتك مدام كل ما حتخرج حتعمل لنا دبكة وعطلة وترهبنا بالامن المركزي كأنك نازل تحرر فلسطين واحنا الاسرائيليين 
صلي في البيت صلي في البيت صلي في البيت وفي رقبتي انا قدام ربنا

ولا حتى ما تصليش خالص

حتعمل ايه بالصلاة لما اسعاف تتعطل ويموت فيها مريض زي ما حصل ما مبارك قبل كده؟ 
حتعمل ايه بالصلاة لما تلقي الرعب في قلوب المصلين بجيش الامن المركزي اللي انت نازل بيه ده؟ انت ما تعرفش ان شكلهم لوحده ممكن يروع الناس ومن روع مؤمنا روعه الله يوم القيامة؟
حتعمل ايه بالصلاة لما انت تنزل تصلي بالهلولة دي وعشان حضرتك بتصلي واحد تاني مواطن مسكين، مالوش الا ربنا فعلا، لا له جماعة ولا رئاسة ولا امن مركزي، ونازل يصلي عشان عايز يقابل ربنا فعلا مش عايز يستعرض قدامنا انه بيصلي، تروح عليه الصلاة في الجامع ويضطر يصليها في بيتهم ولا في الطريق ولا ما يعرفش يروح ولا يرجع وتروح عليه خالص؟
يا عم اعمل جامع في جنينة القصر الجمهوري وخد الحرس يصلوا معاك على الضيق كده بدل البوليكة اللي بتعملها على كل فرض، ولما تبقى تسافر المحافظات زي كده ابقى صلي في استراحة الرئاسة وجماعة انشالله بمراتك وعيالك الاتنين اللي بيتخانقوا مع ظباط الشرطة ويضربوهم عشان بيسألوهم عن البطاقة، حتخلونا نتعاطف مع الشرطة كمان؟ هو ايه ياختي ده؟ احنا عمرنا ما مر علينا رئيس كل ما يتوضى يبقى خبر عاجل كل ما يصلي يبقى مانشيت… شكرا عرفنا انك مؤمن.. ما تبسطهاش اكتر من كده
مبارك كانت كل الناس بتدعي عليه.. بس اكتر دعوات كان بياخدها بسبب التشريفات ولما واحد مات في الاسعاف بسببه سواق تاكسي قالي: الراجل ده مش حيكمل السنة دي.. ربنا ما يرضاش بكده.. وفعلا.. صدق سواق التاكسي
يا حاج مرسي: وسكنتم في مساكن الذين ظلموا أنفسهم وتبين لكم كيف فعلنا بهم وضربنا لكم الأمثال، وقد مكروا مكرهم، وعند الله مكرهم، وإن كان مكرهم لتزول منه الجبال
الله الله الله.. حلوووووووووووووةةةة.. حلوة قوي، بتخش في النخاشيش بتاعة الجلد كده.. هو فيه نخاشيش في الجلد؟ ما اعرفش.. بس هي بتخش وتتشرب كده كأنك داهن فيكس او ابو فاس.. بتعمل حاجات الاية دي
فأنت يا حاج مرسي مكرك انت والجماعة مكر خايب ونايب وفاشل مش زي مكر مبارك، يعني لا تزول منه الجبال ولا حتى الناموسة.. خليك ماشي بستر الله بلاش تتغر
اتق ربنا أمرسي.. اتق ربنا.. انت خارج تصلي ولا ترازي الناس وتخليهم يدعوا عليك.. ما هو الناس يا اما حيدعوا عليك يا اما حيكفروا
انا لحد دلوقت اعرف 5 بنات قلعوا الحجاب بس بسبب الاخوان والسلفيين.. حتقابلوا ربنا بالناس دي ازاي؟ والبنات مش عايزين يتحنتفوا ولا حاجة، ده واحدة منهم تقريبا ما بتتسرحش ولامة شعرها كحكة.. بس مش عايزة تبقى شبهكوا في حاجة
ما هو يا تحلوا عن الاسلام يا تحلوا عنا… ويا ريت تحلوا عن الاتنين نبقى شاكرين جدا

Advertisements
Standard

2 thoughts on “الرئيس المؤمن حيكفر الشعب …

  1. 3alijouzou says:

    رائعة يا نواره .. رائعه … يا سلام .. إن من البيان لسحرا .. وأنت ساحرة .. يا ريت فينا نضمها لهالمنتدى .. عندا أكاونت Posterous??

  2. Walid Nouh says:

    <html><head><meta http-equiv="content-type" content="text/html; charset=utf-8"></head><body dir="auto"><div><div style="text-align: right;direction: rtl; ">و لصوت نوارة في المنتدى خير من ألف رجل … هي من فصيل التنانين النارية …&nbsp;</div><div style="text-align: right;direction: rtl; "><br></div><div style="text-align: right;direction: rtl; -webkit-text-size-adjust: auto; "><br></div></div><div style="-webkit-text-size-adjust: auto; "><br></div></body></html>

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s